Posted by digimalt 11 hrs ago in Announcement
Source: serchhip.wordpress.com
November ni 14, 2010 zan khan Serchhip Darnam Veng a Ramthar UPC(NE) BiakIn ah nula leh tlangval an chesual lai man an ni a, hei vang hian chawlhkarkhat lai Ramthar UPC(NE) BiakIn hi khar a ni a, amaherawhchu UPC Bial Board Meeting in heng nula leh tlangval chesual te hi a ngaihdam tak avangin November ni 21, 2010 atang khan BiakIn hi hawngin Kohhran mipui te an inkhawm leh thei chauh a ni.
BiakIn a chesual, an manchhuah tak te hi Serchhip khawchhunga cheng ve ve an ni a, Nov. ni 14 zan hian rinhlehna an lo neih ruk tawh avangin an Kohhran Upa pakhat Upa Vanlalsanga chuan BiakIn hi zan dar 10:10pm vel khan a zu endik a, heng nula leh tlangval te hi an chesual lai tak a zu phawk ta niin kan palai a hrilh. An chesual lai mit ngeia hmutu Upa Vanlalsanga’n kan palai a hrilh zel danin an BiakIn hi a thlang deuhvah RCC in an sa mek a, an Sande Sikul an thiah lailawk avangin an BiakIn bathlar ah hian Sande Sikul an kai mai thin a, BiakIn chhungah tak ni lovin Sande Sikul atana an hman an BiakIn bathlar ah chuan Sande Sikul thutthleng dawhzawm -in an lo chesual ta a ni a ti bawk.
A mipa zawk hian Bike a keng a, chu chu Kohhran hian an hrensak nghal bawk a, Ramthar UPC(NE) Kohhran hian an sakhaw serh leh sang tihbawrhban chungchang hi Bial Board Meeting an an thlen nghal a, Bial Board chuan District Committee ah an thlen chho veleh nghal a, mahse an chetsualna hmun hi BiakIn chhung tak a nih loh avangin Bial Board Meeting hnenah an hlanchhawng veleh a, Bial Board Meeting hi Nov. ni 19 zan khan an Bialtu Pastor Quarter ah Meeting lehin heng nula leh tlangval chesual te hi Pathian hmingin an ngaidam ta a ni. An Bike hrensak pawh Nov. ni 20 inrinni zing khan an pelet leh ta bawk.
Bial Board Meeting thu angin Nov. ni 21 Pathianni chawh -ma khan Tirhkoh T. Zakunga’n Ramthar UPC BiakIn hi a hlan thianghlim a, dan pangngai angin inkhawmna te neiin BiakIn hi an hawng zui leh ta a ni. Ramthar UPC Kohhran hi Kum 1994 a din kha niin Kohhran Member 120 vel an lawi mek a, Upa 3 awmin Tual Upa 2 leh Tirhkoh pakhat an awm bawk.
